Kejsi Tola përfaqëson Shqipërinë në “Eurosong 2009”

Këngëtarja e re nga Shqipëria, fituesja e edicionit të fundit të spektaklit “Ethet”, Kejsi Tola, do të përfaqësoj Shqipërinë në festivalin evropian të këngës “Eurosong 2009”, që këtë vit do të mbahet në Moskë të Rusisë. Kejsi mbrëmë u shpall fituese e edicionit të 47-të të Festivalit të Këngës në Radiotelevizionin Shqiptar, me ç’rast ajo ka fituar të drejtën për të përfaqësuar vendin në festivalin evropian. Fitoren e Kejsit e ka mirëpritur publiku i pranishëm në Pallatin e Kongreseve, të cilët kanë duartrokitur gjatë pas fitores së saj. Kejsi me këngën me titull “Më merr në ëndërr”, me tekst të Agim Doçit dhe kompozim të Edmond Zhulalit, ka sfiduar 19 konkurrentë të tjerë, në mesin e tyre edhe emra të njohur të muzikës shqiptare, të tillë si: Rovena Dilo, Kujtim Prodani, Juliana Pasha, Soni Malaj dhe të tjerë.
Vendi i dytë në këtë festival i takoi duetit Juliana Pashës dhe Luiz Ejllit me këngën “Një jetë”, ndërsa i treti grupit të njohur nga Shqipëria, WSF, me këngën “Jehonë”.
Adelina Thaçi dhe Vedat Ademi, të vetmit kosovarë që morën pjesë në këtë festival, megjithëse nuk arritën të hynin në treshe, janë votuar mirë nga anëtarët e jurisë. Madje, për Adelina Thaçin, pikët maksimale kanë qenë 17. Adelina u paraqit me këngën “Orët e fundit”, një krijim i kompozitorit të njohur nga Shqipëria, Alfred Kaçinari, me të cilin këngëtarja ka bashkëpunuar edhe më herët, duke kujtuar këtu këngën e suksesshme “Pres”.
Por, një fat jo i mirë në këtë festival mbrëmë e ka përcjellë këngëtarin e vetëm nga Shkupi, Shpat Kasapi. Edhe pse mjaft i pëlqyer nga publiku, shumica e anëtarëve të jurisë, në mesin e të cilëve ishte edhe kompozitori nga Kosova, Florent Boshnjaku, Shpatin e kanë votuar vetëm me një pikë. Por, nuk ishte vetëm ky fati i keq i Shpatit në këtë festival. Me t’u prezantuar në festival, mediat në Shqipëri kanë përfolur mjaft këngën e tij, që, sipas mediave të atjeshme, kënga e Shpatit më tepër kishte motive turke sesa shqiptare.
Ndryshe, këngëtarja Albërie Hadërgjonaj, e cila vetëm një javë para këtij festivali, në një intervistë për mediat e atjeshme, kishte folur me dashuri për pjesëmarrjen e saj në këtë festival, madje duke thënë se pretendonte edhe fitoren, nuk është prezantuar fare në festival.

» dj master 2009 hit's