Mariah Carey kalon Elvis Presleyn

Mariah Carey është bërë këngëtarja e dytë e cila arrin shifrën e 18 singleve, që janë radhitur të parat në top listën amerikane, duke mposhtur edhe legjendën e muzikës Elvis Presleyn, i cili tashmë radhitet në vendin e tretë. Kënga e re e këngëtares, “Touch My Body”, ka arritur të kryesojë listën e 100 këngëve më të mira të Billboard-it, duke u bërë hiti i 18-të që zë vendin e parë, vetëm dy hite më pak se rekordi që mbahet nga grupi legjendar ‘Beatles’. Carey, albumi i parë i të cilës është edituar 18 vjet më parë, deri tani kishte ndarë vendin e dytë me Presleyn, i cili kishte arritur që të jetë numër 1 në top listën amerikane me 17 hite. “Vërtet kurrë nuk mund ta vendos veten time në kategorinë e njerëzve të cilët jo vetëm kanë revolucionarizuar muzikës, por po ashtu kanë ndryshuar botën. Kjo është një kohë dhe periudhë tërësisht ndryshe... Thjesht, ndjehem e gëzuar dhe mirënjohëse”, ka thënë këngëtarja, e cila aktualisht është Londër, në kuadër të turneut evropian. Me hite të tilla si kënga e vitit 1993 "Hero" dhe ajo e 1995-ës "Fantasy," Mariah Carey ka arritur të qëndrojë në maje të top listave muzikore, duke u bërë një nga artistet që ka shitur më së shumti albume gjatë viteve 90-ta. Pas një numri albumesh jo edhe aq të mira, rikthimi i saj është shënuar me CD-në e 2005-ës "The Emancipation of Mimi," i cili përmbante 2 hite të mëdha. Megjithatë, me albumin e saj të ri "E=MC2," i cili pritet të dalë në shitje më 15 prill, mendohet se Carey ka gjasa të barazojë rekordin e grupit “Beatles” me 20 singëlla të shndërruar në hite.