Megjithatë Zana e fiton vizën – pjesëmarrja diskutabile

Bukuroshja kosovare, Zana Krasniqi ka fituar vizën për në Vietnam, mirëpo është diskutabile pjesëmarrja e saj në Miss Universe 2008, që mbahet në këtë shtet.

“Do zoti dhe nuk do të kemi probleme të tjera gjatë festivalit”, ka thënë fotografi shqiptar Fadil Berisha.

Bukuroshes kosovare autoritetet e Vietnamit ia kishin refuzuar vizën me pasaportë të UNMIK-ut, përderisa me intervenimin e ambasadës se Shqipërisë në Shtetet e Bashkuara të Amerikës, ajo ka marrë vizën me pasaportë shqiptare.

Autoritet qeveritare të Vietnamit kontestojnë pavarësinë e Kosovës, kështu që ata kanë bërë të qartë se do bëjnë problem për pjesëmarrjen e Kosovës në këtë spektakël. Përveç Vietnamit, që ka kërcënuar se do të tërhiqet nga gara, tërheqjen e kanë paralajmëruar, Serbia, Kroacia (pasi që misi i këtij shteti është nga serbia) dhe Bosnja Hercegovina.