Elvana Gjata dhe Skills me nga gjashtë nominime

Elvana Gjata dhe Skills me nga gjashtë nominime në "Video Fest ‘08"

Bukuroshja nga Shqipëria, Elvana Gjata, dhe rep-bendi kosovar “Skills”, kanë kryesuar me nominime në edicionin e sivjetmë të “Video Festit” muzikor, që do mbahet më 19 maj në Prishtinë.
Nominimet janë përzgjedhur në mesin e 144 videoklipeve konkurruese, nga juria e përbërë nga 12 persona. Pretendentë për të fituar çmimin kryesor, “Videoklipin më të mirë të vitit”, janë Skillz me “Ah femrat”, Elvana Gjata me “Mamës”, Kaltrina Selimi me “Auto Stop” dhe Elia Zaharia me “31 October”.

Në mesin e të nominuarve kryesojnë Elvana Gjata me “Mamës” dhe Skillz me “Ah femrat”, që të dyja videoklipet me nga gjashtë nominime. Ata pasohen nga Kaltrina Selimi me pesë nominime për videoklipin e këngës “Autospot”.

Nga konkurrimi janë përjashtuar Adelina Ismaili, Genta Ismaili e Leonora Jakupi, ndërsa si justifikim organizatorët kanë shpjeguar: “Në fillim të punës së saj, juria ka vendosur që për shkak të mesazheve specifike që bartin në vete, të mos hyjnë në konkurrencë video spotet në vijim: Genta & Geti (“Krejt e dinë”), Grupi i këngëtarëve “Boll ka fol kuklla”, Adelina Ismaili (“Trimit tim”), Leonora Jakupi (“Të falem Kosovë”), Aurora (“Amaneti”), Eliza Hoxha (“Për ata që s’janë”)”.