Campbell udhëton në Brazil për të dhuruar gjak..!

Supermodelja Naomi Campbell ka fluturuar drejt Brazilit me qëllim që të ndihmojë këtë vend, i cili përballet me epideminë e etheve tropikale.
Ajo planifikon të dhurojë gjak dhe të rrisë vetëdijen për sëmundjen e mushkonjave, që ka prekur rreth 60 mijë njerëz në Brazil, dhe ka vrarë 50 prej tyre. “Duhet të ndihmoj Brazilin dhe do të dhuroj gjak”, ka thënë modelja para se të nisej. Ky është udhëtimi i parë i saj në Amerikën Latine, që kur u operua në një spital të Sao Paolos në shkurt, për largim urgjent të një ciste. Campbell e quajti veten ambasadore e Rio-s dhe kërkoi nga qeveria të ndërmerret aksion për të zbutur gjendjen. "E dua Brazilin, siç e dini jam ambasadore e Rio-s. Në parim, nuk duhet fajësuar të gjithë, mendoj se qeveria duhet të gjejë një mënyrë për të zgjidhur problemin, duke përmirësuar gjendjen nëpër spitale dhe kujdesur për personat me ethe tropikale", tha modelja 37-vjeçare, e cila është vizitore e shpeshtë e Brazilit. Vizita e Campbell në Rio De Zhaneiro vjen vetëm dy javë pasi u arrestua gjatë një udhëtimi me British Airways në Londër, për shkak se kishte sulmuar një polic.